“Толькі наперад і толькі разам!”

За сваю больш чым векавую гісторыю прафсаюзы сталі сацыяльнай рэальнасцю і ўключаны ў структуру грамадства ў якасці найважнейшага элемента. Ва ВП “Віцебскаблгаз” прафсаюзная работа вядзецца ўжо больш за 20 гадоў. За гэтыя гады адбылося шмат перамен, але галоўнай задачай было і застаецца аб’яднанне намаганняў працоўных у абарону сваіх сацыяльна-эканамічных і палітычных правоў і інтарэсаў. Цяпер аб’яднаная прафсаюзная арганізацыя ВП “Віцебскаблгаз” налічвае сто працэнтаў працоўных. Гэта – прынцыповы падыход кіраўніцтва прадпрыемства, які ў цяперашні час імкнуцца пераняць многія працоўныя калектывы, назіраючы, якога эфекту і развіцця можна дасягнуць разам!

Быць сябрам прафсаюза ВП “Віцебскаблгаз” – гэта значыць быць актыўным, захопленым, дзейным, цікавым, а значыць і паспяховым! Дакладнае разуменне рэспубліканскіх задач, укараненне сваіх прагрэсіўных і, што немалаважна, рэальных ідэй дазволілі нам сёння сфарміраваць магутны прафсаюзны рух.

Аб’яднаная прафсаюзная арганізацыя ВП “Віцебскаблгаз” мае наступную структуру: 10 пярвічных прафсаюзных арганізацый, у кожнай з якіх створаны некалькі прафсаюзных груп, усяго іх 15. Дадзеная структура набліжана да структуры прадпрыемства.

Аб’яднаны прафсаюз ВП “Віцебскаблгаз” – гэта граматны і перспектыўны тандэм аб’яднанага прафкама і кіраўніцтва прадпрыемства, зладжаная праца якога ахоплівае не толькі ўсе сферы прафесійнай дзейнасці працоўных, але падтрымлівае і заахвочвае цікавасць і самарэалізацыю працаўнікоў у розных напрамках: няхай гэта будзе спорт, народная творчасць або мастацкая самадзейнасць.

Здароўе і жыццё людзей знаходзіцца на пастаянным кантролі Урада Рэспублікі Беларусь, Федэрацыі прафсаюзаў Беларусі, РК Прафсаюза Белэнергапалівагаз, а таксама і аб’яднанай прафарганізацыі прадпрыемства. Праводзіцца пэўная работа ў гэтым кірунку: семінары па ахове працы і пажарнай бяспецы, навучанне грамадскіх інспектараў пярвічных прафсаюзных арганізацый ВП “Віцебскаблгаз” для павышэння ўзроўню ведаў і прафесійнай падрыхтоўкі. Пастаянна ажыццяўляецца перыядычны кантроль за станам умоў аховы працы.

Падрыхтоўка і рэалізацыя ўсіх праектаў і мерапрыемстваў патрабуе вялікай уключанасці, прафесіяналізму, творчых знаходак, фінансавых укладанняў і таму немагчымая без аб’яднання намаганняў і магчымасцей кіраўніцтва ВП “Віцебскаблгаз”, аб’яднанага прафкама прадпрыемства і, вядома ж, кожнага працаўніка. Дзякуючы такому падыходу, замацаванаму шматгадовай практыкай, унітарнае прадпрыемства дынамічна развіваецца.

Нездарма ў хаду ў газавікоў такія дэвізы: “Калі мы з’яднаныя – мы непераможныя!” і “Ні кроку назад, ні кроку на месцы, а толькі наперад і толькі ўсе разам!”